Есенберлин даңғылында жаяу жүргіншілер көпірі ашылды

Өскемен қаласындағы Есенберлин даңғылында жаяу жүргіншілерге арналған жаңа өткел пайдалануға берілді. Көпір құрылысын арнайы барып тексерген қала әкімі Алмат Ақышов нысанның қазіргі жай-күйімен танысып, тұрғындардың қауіпсіздігі үшін өткелді уақытша ашу туралы шешім қабылдады, деп хабарлайды Minut.kz тілшісі.

Қала әкімі Алмат Ақышов құрылыс алаңында берген сұхбатында көпірдің техникалық тұрғыдан қауіпсіз екенін растады. Әзірге нысанның тек негізгі темір конструкциялары толық аяқталған.

Уақытша болсын, өткел ашыла беруі керек. Қазір күн райына байланысты көпірді қаптау жұмысы кейінге қалдырылады. Ауа температурасының тұрақсыздығы – бірде жылы, бірде суық болуы – сыртқы қаптама жұмысының сапасына әсер етуі мүмкін. Техникалық жағын ескеруіміз керек. Бірақ, ең бастысы – адамдардың жүруіне қауіпсіздігі тексерілді, сондықтан олардың жолын кеспеуіміз қажет, – деді әкім.

Есенберлин даңғылындағы бұл өткел – қала тұрғындары үшін аса қажетті инфрақұрылымдық жоба. Оның маңыздылығын бірнеше фактормен түсіндіруге болады:

• Көлік ағынының артуы: Даңғыл ашылғаннан бері бұл аумақта автокөлік қозғалысы едәуір ұлғайды.
• Оқушылар қауіпсіздігі: Дәл осы ауданда жаңа мектеп ашылып, оқушылар саны көбейді. Ата-аналар мен тұрғындар үшін балалардың жолдан қауіпсіз өтуі – басты мәселе.
• Қолжетімділік: Енді қалалықтар жолдың екінші жағына өту үшін бақдаршамда күтіп тұрмай немесе ұзақ айналып жүрмей, тікелей өткелді қолдана алады.

Жалпы құны 400 миллион теңгеге бағаланған бұл өткел ауа райы тұрақталған сәтте шынымен қапталып, толыққанды аяқталатын болады.

Айта кетейік, Сәтбаев даңғылы бойында, «Фреш маркет» сауда үйінің тұсында да дәл осындай жаяу жүргіншілер көпірін салу жоспарда бар. Қала әкімдігі бұл бағыттағы жұмыстар туралы да мәлімдеді.

Нысанның жобалық-сметалық құжаттамасы бұған дейін дайындалған. Текқ азіргі экономикалық ахуалды ескере отырып, жобаға тиісті өзгертулер енгізілуі керек. Мердігер анықталған. Құрылысты жүргізетін компания белгілі. Қажетті бюджет бөлінген жағдайда, құрылыс жұмысы биыл-ақ басталуы мүмкін.

Өскемен билігі қаланың көлік инфрақұрылымын жақсарту және жаяу жүргіншілерге қолайлы орта қалыптастыру бағытындағы жұмыстарды жүйелі түрде жалғастыра бермек.

Minut.kz