Мемлекеттік қызметшілердің әдебі – ел сенімінің тірегі

Мемлекеттік қызмет – ел дамуының өзегі, халық пен билік арасындағы алтын көпір. Ал сол көпірдің берік болуына қызметкерлердің кәсібилігімен қатар, олардың әдеп мәдениеті зор ықпал етеді. Мемлекеттік қызметшінің бойындағы сыпайылық, жауапкершілік, әділдік және қарапайымдылық қасиеттері мемлекеттің беделін айқындайды.

Әдеп – қызмет мәдениетінің өзегі

Мемлекеттік қызметші – ел алдында жүрген тұлға. Ол – халықтың өтінішін қабылдайтын, әлеуметтік мәселені шешетін, түрлі деңгейдегі шешімдерді жүзеге асыратын лауазымды тұлға. Оның әрбір сөзі мен іс-әрекеті көпшіліктің назарында. Сондықтан мемлекеттік қызметшінің әдебі – тек жеке мінез емес, ол мемлекеттік саясаттың мәдени келбеті.

Мемлекеттік қызметшілердің әдеп кодексі – қызметтік мінез-құлықтың нақты қағидаларын айқындайтын құжат. Онда қызметкердің азаматтармен қарым-қатынас жасау әдебі, басшылар мен әріптестер арасындағы сыйластық, мемлекеттік құпияны сақтау, қоғам алдындағы ашықтық сияқты маңызды талаптар белгіленген. Бұл кодекс – мемлекеттік қызметтегі адалдық пен әділдіктің басты кепілі.

Әдептілік – адамның ішкі мәдениетінің көрінісі. Ал мемлекеттік қызметшінің әдептілігі – тұтас мемлекеттің айнасы. Халық қызметшісінің дауысын, сөйлеу мәнерін, киім киісін, мінезін бақылап отырады. Бір қызметкердің дөрекі сөзі немесе немқұрайлы ісі бүкіл мемлекеттік аппаратқа көлеңке түсіреді. Сондықтан әрбір мемлекеттік қызметші өзін тек кәсіби емес, рухани жағынан да жетілдіруге тиіс, – дейді ҚР Мемлекеттік қызмет істері агенттігі ШҚО бойынша департаменті басшысы Е.Айқымбеков.

Әдеп пен адалдық – халық сенімінің негізі

Қазіргі таңда Қазақстан қоғамы жаңару мен әділеттілікті басты құндылық ретінде қабылдауда. Мемлекет басшысы өз Жолдауларында да мемлекеттік аппараттың ашық әрі халыққа жақын болуын үнемі атап өтеді. Халықтың билікке деген сенімі – қызметшілердің іс-әрекетіне, әдебі мен мәдениетіне тікелей байланысты.

Мемлекеттік қызметші әділ болуға, шешім қабылдауда жеке мүддені емес, қоғам игілігін басшылыққа алуға тиіс. Ол сыбайлас жемқорлықтан, билікті теріс пайдаланудан, қызметтік артықшылықты жеке мақсатта қолданудан аулақ болуы керек. Бұл – жай талап емес, азаматтық жауапкершілік. Себебі мемлекеттік қызметші – халықтың аманатын арқалаған тұлға.

Кейде бір жылы сөз, ілтипат пен түсіністік үлкен мәселенің шешімін табуға жол ашады. Азаматтармен тіл табыса білу – шын мәніндегі кәсіби мәдениеттің белгісі. Әдепті қызметкер әр адамның мәселесіне құрметпен қарап, оған көмектесуді өзінің міндеті емес, парызы деп қабылдауы тиіс.

Әдеп мәдениеті – рухани жаңғырудың бөлігі

Қазақ халқы ежелден әдебі мен ізеттілігін жоғары қойған. «Сөзіне қарап кісісін таны» немесе «Адам көркі – шүберек, сөз көркі – әдеп» деген даналықтар осы ұғымның мәнін айқындайды. Бүгінгі мемлекеттік қызметшілер де осы ұлттық құндылықтарды сақтап, заман талабына сай кәсіби мәдениетті қалыптастыруы қажет.

Әдеп мәдениеті – тек сыртқы сыпайылық емес. Бұл – адамның өз ішкі әлемін, мінез-құлқын, ойлау мәдениетін қалыптастыру. Мемлекеттік қызметкер әрбір шешімді қабылдағанда оның қоғамға әсерін, халықтың сеніміне тигізер ықпалын ойлауы тиіс. Өйткені сенім – ең нәзік капитал, оны қалыптастыру жылдар алса, жоғалту бір сәттік іс.

Қазіргі заманда мемлекеттік қызметтің тиімділігі тек көрсеткіштермен емес, қоғаммен қарым-қатынастың мәдениетімен өлшенеді. Мемлекеттік қызметшілердің халықпен тікелей байланыс орнатуы, кері байланысқа ашық болуы – елдің дамуындағы маңызды шарттардың бірі.

Әдеп пен мәдениет – мемлекеттің беделі

Мемлекеттік қызметшінің мінсіз әдебі – қоғамдағы тәртіп пен мәдениеттің көрсеткіші. Әдепті қызметкердің бойында парасат пен ұят, сабыр мен ілтипат қатар жүреді. Мұндай тұлға әріптестері үшін де, жастар үшін де үлгі.

Мемлекеттік қызмет – бұл мансап емес, бұл миссия. Ел игілігіне қызмет ету, халықтың сенімін ақтау, мемлекеттің дамуына үлес қосу – осының барлығы қызметшінің кәсіби және адами қасиеттеріне тікелей байланысты. Әдептілік, әділдік және жауапкершілік – осы миссияның темірқазығы. Халыққа жақын болу, ашықтық таныту, әділ шешім қабылдау – осылар мемлекеттік қызметшінің басты қағидатына айналуы тиіс. Сонда ғана қоғам мен билік арасындағы өзара сенім нығайып, мемлекет беделі арта түседі, – дейді ҚР Мемлекеттік қызмет істері агенттігі ШҚО бойынша департаменті басшысы Е. Айқымбеков.

Minut.kz