«Восток» стадионы жөнделіп бітуге жақын

Шығыс Қазақстан облысының әкімі Нұрымбет Сақтағанов Өскемендегі «Восток» стадионында жүріп жатқан жөндеу жұмыстарының барысын тексеріп, өңірдегі футбол инфрақұрылымының болашағына қатысты жоспарларымен бөлісті, деп хабарлайды Minut.kz тілшісі.

Аймақ басшысының айтуынша, қазіргі уақытта стадионды Қазақстан Премьер-лигасының (ҚПЛ) талаптарына сәйкестендіру жұмыстары шешуші кезеңге өтті. Нысанды пайдалануға берудің нақты мерзімі де белгілі болды.

Әкім стадиондағы ішкі және сыртқы жөндеу жұмыстарының аяқталуға жақын екенін атап өтті. Жоспар бойынша, барлық дайындық сәуір айының соңына дейін бітуі тиіс.

Алғашқы ойынды 9 мамыр күні өткізу жоспарланып отыр. Қазіргі таңда қажетті қаржы, құрылыс материалдары және ұйымдастыру шаралары уақтылы жүзеге асырылуда, – деді Нұрымбет Сақтағанов.

Халықаралық деңгейдегі жаңа стадион салынбақ

Сонымен қатар, аймақ басшысы Өскеменде УЕФА стандарттарына сай келетін мүлдем жаңа, жабық футбол аренасының құрылысы туралы маңызды жаңалықты жеткізді.

Қазіргі уақытта спорт нысанының жобалық-сметалық құжаттамасы дайындалып, сараптамадан өтуде. Сараптама қорытындысы қыркүйек айының соңына дейін дайын болады. Күз айында барлық рәсімдер аяқталып, құрылыс жұмысы басталады.

Облыс әкімі 2025 жылғы маусымның қорытындысы бойынша Премьер-лигаға жолдама алған «Алтай Өскемен» футбол клубының дайындығына да тоқталды.

Ең бастысы, ойыншылар жақсы дайындық үстінде. Олар Астана мен Алматы қалаларында өткен ойындарда өз шеберліктерін көрсете білді. Алдағы уақытта осы стадионда жанкүйерлерімізді жарқын жеңістермен қуантады деп сенемін, – деп түйіндеді сөзін аймақ басшысы.

Айта кетейік, «Восток» стадионындағы жаңғырту аясында заманауи VAR жүйесі, жаңа газон, LED-борттар және жаңартылған жарықтандыру жүйесі орнатылуда. Бұл жұмыстар «Алтай Өскемен» клубының элиталық дивизионда өз алаңында ойнауына мүмкіндік береді.

Minut.kz