Интернет-алаяқтықтың жаңа түрі пайда болды

Өскемен қаласының әкімдігі интернет-алаяқтықтың жаңа түрі шыққанын айтып, халықты алданып қалмауға шақырады, деп хабарлайды Minut.kz тілшісі.

Бас прокуратураның Құқықтық статистика және арнайы есепке алу комитетінің мәлімдеуінше, желіде «Жалған iPhone сатып алу» схемасы пайда болған. Бұл жолы қаскөйлер тұрғындарды алдау үшін Apple компаниясы мен PayPal төлем жүйесінің атын жамылып жүр.

Алаяқтардың айласы қалай жүзеге асады?

• Жалған хат: Сіздің поштаңызға Apple атынан өте шынайы безендірілген хабарлама келеді. Онда сіздің PayPal арқылы қымбат iPhone сатып алғаныңыз жазылып, егер бұл транзакцияны сіз жасамасаңыз, «операцияны шұғыл тоқтату» ұсынылады.
• Психологиялық қысым: Хатта көрсетілген нөмірге қоңырау шалсаңыз, тұтқаны алаяқтар көтереді. Олар сіздің аккаунтыңызды «бұзып кірді» деп сендіріп, шотыңыздағы ақшадан айырылып қалмау үшін шұғыл әрекет етуді талап етеді.
• Тұзақ: Банк картасы мен жеке деректерді «қорғау» сылтауымен олар құрылғыңызға қашықтан қол жеткізуге арналған арнайы бағдарламаларды (мысалы, AnyDesk, TeamViewer және т.б.) орнатуды сұрайды. Бағдарлама жүктелген сәтте алаяқтар телефоныңызды толық бақылауға алып, мобильді банкингтегі ақшаңызды жымқырады.

Өзіңізді және қаражатыңызды қалай қорғауға болады?

Өскемен қаласының әкімдігі тұрғындарды барынша сақ болуға шақырады және келесі ережелерді есте сақтауды ұсынады:

• Күмәнді хаттарға сенбеңіз: Электронды поштаға келген белгісіз хаттарда көрсетілген телефон нөмірлеріне ешқашан қоңырау шалмаңыз.
• Бөтен бағдарламаларды орнатпаңыз: Бейтаныс адамдардың нұсқауымен, әсіресе «қауіпсіздік үшін» деген сылтаумен телефоныңызға ешқандай қосымша жүктемеңіз.
• Ресми дереккөзді тексеріңіз: Сатып алулар немесе транзакциялар туралы ақпаратты тек Apple-дің ресми сервистері (телефон параметрлері немесе apple.com сайтындағы жеке кабинет) арқылы ғана тексеріңіз.
• Қорғанысты күшейтіңіз: Барлық аккаунттарыңыз бен әлеуметтік желілеріңізге екі факторлы аутентификацияны (кіруді SMS немесе арнайы код арқылы растау) қосып қойыңыз.
• Есіңізде болсын: Егер сізге күтпеген жерден қандай да бір ірі сатып алулар туралы хабарлама келсе, байбаламға салынбай, ақпаратты салқынқандылықпен тексеріңіз. Сақтық – алаяқтарға қарсы ең басты қаруыңыз!

Аяулым Әділқызы