Шығыста 4 мың маманның орны бос

Шығыс Қазақстан облысында алдағы жылдары 15 мыңнан астам маман қажет болады. Ал қазірдің өзінде құрылыс, энергетика, өнеркәсіп, білім беру, денсаулық сақтау, көлік және әлеуметтік салада шамамен 4 мың маманға сұраныс бар, деп хабарлайды Minut.kz тілшісі.

Облыс әкімі баспасөз қызметінің ақпаратынша, өңір басшысы Нұрымбет Сақтағанов Премьер-министр Олжас Бектеновтің төрағалығымен өткен Үкімет отырысына қатысқан.

Күн тәртібінде көші-қон саясаты мыселесі қаралған. Үкімет басшысы квазимемлекеттік сектор мен бизнес үшін сұранысқа ие, білікті мамандарды елге тарту жұмысын күшейтуді тапсырды.

Жалпы Шығыс Қазақстанға 2017-2025 жылдар аралығында 2209 отбасы қоныс аударған. Олардың ішінде 82 адам жоғары білімді, 110 адам орта білімді, 143 адамның кәсіби білімі жоқ. Барлығы 335 еңбекке қабілетті азаматтың 195-і жұмыспен қамтылған.

Өткен жылы қоныс аударушыларды қолдауға мемлекет тарапынан 496 млн теңге бөлінді. Қаражат көшу шығындарын өтеуге, тұрғын үйді жалға алуға және арнайы сертификаттар беруге бағытталған.

Minut.kz